Зүгээр л нэг аялгуу хэрнээ сонсох бүрт амьдралын минь аз жаргалтай нэгээхэн үед эргүүлэн аваачдаг болохоор, хэдэн мянган удаа ч хамаагүй цаг хугацааг огоорон сонсоод л баймаар,,, Сонсох бүртээ санаа алдаж, сэтгэлд минь уйтгар амтагддаг ч, дахиж хэзээ ч ирэхгүй тэр л мөчүүдийг нэхэн дурсах нь аз жаргал ч юм шиг.

Үнэндээ миний дурласан тэр хүн л надад энэ аяыг сонсгож, сонсон суухдаа "БИ" хайр дурлалдаа мансууран явсан болохоор үгээр хэлж боломгүй сайхан мэдрэмжүүд, энэ аялгуутай хамт зүрх сэтгэлд минь тамгалагдан үлдсэн биз ээ.

Хөгжим тоглуулагчаараа өдөр шөнөгүй хаана ч явсан сонсдог байсан ч, өнөөдрийг хүртэл нэрийг нь мэддэггүй байжээ. Санаандгүй байдлаар тоглуулагчин дээрх бүх дуунууд маань устахад, тэр хүн ч гэсэн миний амьдралаас хамтдаа явсан юм байна. Гэхдээ л энэ аяыг би зүрх сэтгэлдээ мэдэрч, сонссоор ,,,

Саяхан "Ютүб"-ээр сэтгэлээ сэргээх санаатай дэлхийн шилдэг аяз, дуунуудыг ээлж дараалуулан сонсож суутал танил аялгуу чихэнд минь сонстох нь тэр. Дөнгөж эхлэхэд нь л миний хоёр нүдийг нулимс бүрхэж, мартаж ядан байсан сэтгэлийн минь орон зайг эргээд тэр хүн дүүргэчихлээ.

Одоо би энэ аялгууны нэрийг мэддэг болсон, хэзээ ч мартахгүй. Түүнтэй хамт байсан дурсамжуудаа үүрд зүрх сэтгэлдээ үлдээх болно.

Нэг ийм үг байдаг шдээ. "Мартах гээд хүчлэх хэрэггүй, магадгүй тэр хүн чиний сэтгэлд байх ёстой болоод л байгаа байх" гэж.

2012-02-16